Վերջերս The Forbes ամսագիրը հրապարակեց ԱՄՆ-ի ամենահանրահայտ գովազդային կերպարների ցուցակը:
Հետաքրքիրն այն է, որ ցուցակի մեծամասնությունը անիմացիոն գովազդային կերպարներ են, որոնք արդեն դարձել են ամերիկյան գովազդային մշակույթի մի մասը:
Ցուցակում առաջատար դիրք են գրավում կլորիկ-մլորիկ M&M's-երը: Այս գովազդային կերպարներն առաջին անգամ հայտնվեցին 1954 թվականի գովազդային արշավում, որի հաջողությունից հետո այս անիմացիոն հերոսները դարձան ընկերության գովազդների կերպարները: Ամեն գովազդում այս երկու վառ անիմացիոն կերպարներն ընկնում են զավեշտալի իրադրությունների մեջ, ինչը ավելի է գրավում դիտողի ուշադրությունը և օգնում այս հերոսներին տարիներ շարունակ մնալ արդիական:
Ցուցակում ներառված անիմացիոն վառ կերպարներից էին նաև MICHELIN ընկերության «անիվներով մարդը» և ռուսական «Կոլոբոկ» հեքիաթի պերսոնաժին հիշեցնող խմորե մարդը` Pillsbury-ն: Pillsbury-ն այնքան հայտնի ու տարածված կերպար էր, որ դրա նմանակն անգամ օգտագործեցին հայտնի «Ghost Busters» ֆիլմում (իհարկե, քիչ փոփոխությունների ենթարկված):
Այս երեք կերպարների մեծ տարածումն ու սպառողների կողմից ուշադրությունը դրանց հանդեպ պայմանավորված է ոչ միայն հետաքրքիր ու գրավիչ տեսքով, այլ նաև սերտ կապով ապրանքի հետ: Երեք դեպքում էլ անիմացիոն կերպարներն ասոցացվում են ապրանքի հետ, քանի որ բաղկացած են դրանից, ինչը դրական է ազդում սպառողի ու ապրանքանիշի «փոխհարաբերությունների» վրա: Նման անիմացիոն պերսոնաժները որոշակիորեն օգնում են ընկերությանն ընդլայնել սպառողի վրա ազդելու գործիքների զինանոցը, հատկապես հետաքրքիր է լինում, երբ նման կերպար սկսում են գործածել նաև ապրանքատեսակի հետ կապ չունեցող ապրանքների ձևավորման մեջ, օրինակ տետրերի, շապիկների և այլն:
The Forbes-ի ցուցակում հենց անիմացիոն կերպարների գերակայությունը հիմնականում պայմանավորված է նաև նրանով, որ մտացածին կերպարներին ավելի լավ է հաջողվում ներկայացնել ընկերությունը, լինել դրա հավաքական կերպարը:
Նման կերպար, բարեբախտաբար կա արդեն նաև մեր գովազդային շուկայում: Դրա դեռևս միակ լինելու գործոնը դրական ազդեց, և ստացվեց այնպես, որ այս «գերակտիվ հայ կնոջ» մի քիչ ագրեսիվ անիմացիոն կերպարը (հեղինակ Արամ Կարապետյան, FinalEntertainment) «պայթեցրեց» մեր շուկան: «Պայթեցրեց» այն իմաստով, որ դեռևս ոչ մի հստակ ու հիշվող անիմացիոն ստացված կերպար չկար մեզանում: Դրա «ստացված» լինելու մասին խոսում է ոչ այնքան բուն կերպարը, դրա վիզուալ ու բովանդակային դիպուկ կառուցվածքը, որքան այն փաստը, որ այս կերպարը ոչ միայն մեկ անգամից ավել գործածվեց տվյալ ընկերության գովազդային հոլովակներում, այլ նաև ներգրավեց գովազդային արշավի շրջանակներում այս կերպարով խաղալիքներ, կերպարի անմիջական մասնակցություն՝ խթանարշավում և այլն: Հտաքրքիր է նաև այն, որ տվյալ անիմացիոն կերպարը խոսում է ոչ գրական լեզվով:
Այսօր Հայաստանում բազմաթիվ գովազդային գործակալություններ կան, որոնք առաջարկում են անիմացիոն կերպարներ ստեղծել կոնկրետ ապրանքի հոլովակի համար: Սակայն մեր գովազդատուները դեռևս հակված չեն նման «ռիսկային» և ծախսատար քայլի գնալ: Սա, իհարկե, հասկանալի պատճառ է: Բայց եթե հետևենք գովազդային հոլովակների ստեղծման համաշխարհային տենդենցներին, ակնհայտ է դառնում, որ անիմացիան անխուսափելի կլինի նաև մեզ համար, սակայն մեծ հարց է, թե երբ կգա անիմացիայի հայկական հաղթարշավը:
Էլլա Կալենց
Comments:
Facebook
